Your cart

必跟!5個護髮好習慣5個護髮好習慣

必跟!5個護髮好習慣5個護髮好習慣

話明「三千煩惱絲」,每個人或多或少都必定有啲關於頭髮嘅問題,例如最普遍嘅乾旱、開叉、毛躁、掉髮等,其實只要能夠注意一下平時嘅日常護理習慣,呢啲問題都可以輕易解決,尤其是係洗髮、梳髮、吹髮,幾乎每日都要做嘅護理程序,更加唔可以掉以輕心!

點洗頭髮先夠乾淨又唔怕乾?


有無發現去髮型屋洗頭後,頭髮總係特別清爽柔順?當然,髮型師嘅吹髮技巧應記一功,但重點係髮型屋嘅洗髮程序唔馬虎,同自己喺屋企扭開花曬淋幾淋,落洗頭水捽幾捽,再沖沖水就完事,其清潔效果實在相差太遠!
洗髮嘅目的係要開啟、洗凈髮絲表面毛鱗片,如果只係好快手咁洗幾下,可能只係洗到髮絲而無洗到頭皮。
提高洗淨效果嘅正確方法:開始洗頭髮之前,先用手指頭或梳將頭髮充分咁梳開,目的係去除脫落嘅毛髮,同埋令角質浮現出來;然後以溫水清洗一次,要將頭皮及頭髮的每一個部位都清洗到,好多時洗頭水唔起泡,係因為頭髮唔夠濕,如果以為唔起泡而猛加洗頭水,就會過度刺激頭皮同髮根,令頭髮越來越乾躁。

護髮素到底只可搽髮尾,定係頭皮都要搽?


坊間流傳護髮素只可以搽喺髮尾,係怕會令頭髮好快出油。實際係要視乎髮質同產品類型。免沖洗護髮素因為係直接留喺髮絲表面,所以只適宜從中間部分搽到髮尾;而一般的沖洗式護髮素,最好係從頭皮抹到髮尾,並且加上輕柔按摩,俾時間頭髮吸收,因為要從生長頭髮的髮根開始滋潤起,效果較好,但使用之後必須要徹底清洗,否則護髮素嘅殘餘物好容易阻塞毛囊,造成頭瘡及頭皮發炎等問題。

有咩方法梳頭髮唔怕打結同靜電?


冬天最易出現呢個問題,可以預備一支注滿清水嘅噴霧,加入幾滴嬰兒油或純橄欖油,梳頭髮時將水噴濕全髮,再慢慢梳理,感覺會更加順暢。要防靜電的話,就要揀木質梳子或防靜電專用梳子,塑膠質料會因為同頭髮摩擦而產生靜電。

點吹頭髮先會順滑,唔旱同起晒毛毛?


「保持距離」係關鍵,吹頭髮嘅時候要注意風筒同頭髮嘅距離,最理想係大概15-20cm左右,風筒唔可以對住頭髮直吹,亦唔可以定喺一個位置吹好耐,否則頭髮就會變得好乾好蓬鬆。正確方法係風口要向下順住吹,而且要邊吹邊搖擺風筒,咁樣隻手係會攰啲,但就無咁傷頭髮!